السلام عليكم ورحمة الله وبركاته
أنا نقلت المدونة لموقع بلوجر
يعني المدونة دي حتفضل بس حستمر واكمل كتابة هناك
ودة الرابط
الجمعة, 08 فبراير, 2008
السبت, 22 سبتمبر, 2007
السلام عليكم
ازيكم يا جماعة..
أنا النهاردة زعلاااااااااانة جداً وغضباااااانة جدا
وعشان اخفف شوية من الغضب دة
رحت لمدونتي حبيبتي أفضفض فيها شوية
للأسف..أثناء تصفحي علي النت لقيت فيديوهات بتهاجم عمرو خالد
ومش واحدة دول كتيييير
ومن باب الفضول اتفرجت عليهم وأنا في قمة الغضب
اللي بينرفزني أكتر حاجة وببقي واصلة لآخري..التعليقات
التعليقات يا جماعة مستفزة جداً جداً ..وفيها كلام مايصحش أن يُكتب علي النت أصلاً
وحاجات متتلككين عليها ..يعني زي مايكون عايزين يغلطوه بالعافية
وكوووول دة عشان الراجل اسلوبه سهل جداً وبسيط جداً ونااااجح جداً..كفاية إنه بيوصل المعلومة والدعوة كويس وبطريقة تخلي الناس فعلاً يقبلوا عليها
كفاية إنه عرف يأثر في الشباب بدرجة كبيرة جداً ونجح إنه يحبب الناس في عمل الخير في الوقت اللي معرفش فيه حد يعمل كدة(مع إحترامي للآخرين مع العلم إني مقصودش أي حد تاني)
المشكلة إن التعليقات فيها درجة من الغباء والسذاجة ..والله العظيم يا جماعة لما بقرأ التعليقات دي بحس فعلاً إن الناس دي مش بتفكر زي مايكون يلاقوا أي حاجة بتهاجم عمرو خالد يصدقوها ويستمروا هما كمان في المهاجمة ..ودة طبعاً بدون تهذيب ومفيش مراعاة إن النقد بيكون بأدب برضه
ولو حد قاللي إن عمرو خالد بيغلط ..ماشي زي ماكل الناس بتغلط بس مش لدرجة إن احنا نوصلها لسب وشتايم في منتهي القباحة..ومهاجمته....وتقليد صوته بطريقة غير لائقة بالمرة
أنا عايزة أقول إن الناس دي فاضية وميهمهاش لا نهضة ولا غيره طول ماهما عمالين يألسوا ويعيبوا علي اللي مايستحقش كدة
فعلاً ..خير تعمل شر تلقي
.. ..
وفي الختام
يكفيني قول
حسبي الله ونعم الوكيل ولا حول ولا قوة إلا بالله
أضافها مـ ـ ـي Maio0oia في شوية جد, مش حسيب حاجة في الدنيا إلا أما انقدها @ 02:03 ص
(4) تعليقات| خبّر عن هذا المقال: |  |  |  |  |  |  |
الثلاثاء, 18 سبتمبر, 2007
السلام عليكم
مش عارفة ليه يا جماعة حاسة إني في صحرا..!!
فين الناس اللي كانت متبعاني من الأول
يا خسارة
لأ أنا كدة حزعل
المهم..
أخييييراً آخر سنة ليا السنة دي(ثالثة ثانوي) في عالم المدارس وإن شاء الله أدخل كلية
وبمناسبة العودة للمدارس::بااااااك تو سكوووووووول::
عايزة أقولكم العذاب اللي بيعانيه طلاب مصر
المصيبة الكبري هي "المواصلات"
طبعاً لافي باص ولا غيره..بس أحب أقولكوا إن الباص بيبقي مكربس برضه
والله دي المواصلات دي عذاب
بعد يوم دراسي ممل ومتعب زي العادة
عايزين بقي نروح ونريح
لأ طبعاً ..راحة ومرواح إيه..!!!؟؟
تيجلك الست هانم المواصلات
والسواقين اللي...........مش لازم نقول
علي فكرة المواصلات وقرفها(في أوقات الدراسة) أساسها الكميات المهوووووولة من الطلبة في المدارس
يعني مثلاً مرة كان يوم زحمة زحمة زحمة
وأنا كنت عايزة أركب وأروح المدرسة
والناس زي النمل..عربية جت وطبعاً كله هجم عليها
وواحد مش عارف يوصل للباب ومش هاين عليه يشوف منظر العربية وهي فاضية من جوة وهو مش عارف يدخل
راح طبعاً..وبكل مهارة ومرونة ..دخل العربية من الشباك
والمشكلة إنه دخل براسه ورجليه طالعة برة
أنا عايزاكوا تتخيلوا بس..
أنا طبعاً ممنعتش نفسي من الدهشة والضحك في نفس الوقت
عشان الولد أو الراجل دة كان لابس معلش يعني في اللفظ"شبشب"
يعني يعمل إيه لو واحد خلعه من رجله وطلع يجري
كسب إيه هو بقي
بدل مايدفع أجرة العربية حيجيب شبشب تاني
دة غير إنك بتروح متأخر بسبب إن السواقين ساعات يقفوا في نص الطريق عشان غلط في الحساب ويقول طب مش طاااالع
..ويعطلنا إحنا بقي..يا عم خلص عندنا شغل ومدارس وطبعاً إنتوا عارفين إيه اللي بيحصل في المدرسة
أنا عارفة إني دخلت في تفاصيل وحاجات غريبة لكن والله يا جماعة أنا وغيري وغيري من الطلبة بنعاني كتير كتير من حكاية المواصلات دي
أنا مرة روحت بيتي متأخرة ساعة أو ساعة ونص بسبب المواصلات
وبالنسبة لصاحبتي ..بعد ما روحت لقت مفاجأة ..
المية مقطوعة
يعني حاجة تفرح وتشرح القلب بصراحة
الواحد فعلاً يحس إنه ليه نفس يذاكر و يروح المدرسة
علي فكرة ..أنا جوايا أكوام هم بالعبيط
بس كفاية كدة عشان معقدكوش
ولا انتوا اتعقدتوا..؟؟!!
مش مهم..
بهزر..lo0o0olأنا واثقة جداً إن اللي بيقروا دة عدوا المرحلة دي بكتير وخاصة اللي من مصر
طيب..
سلام بقي عشان تعبت
الخميس, 13 سبتمبر, 2007
السلام عليكم
كل عام وأنتم بخير ورمضان كريييييييييييييم
أنا عارفة بقالي كتيييير مدونتش بس معلش
أنا لاحظت حاجة بتضايقني أوي
قبل رمضان بشهر تبدأ الإعلانات علي القنوات الفضائية:
"انتظرونااا في رمضان"
مسلسلات من جميع الأنواع والأشكال
زي مايكون الشهر للمسلسلات وبس
عايزين يخلوا الناس تخلص فطار من هنا وتستلم التلفزيون من هنا
ومش بعد الفطار بس دة قبل وأثناء وبعد الفطار
يعني حاجة بجد تنرفز
دلوقتي للأسف عند بعضنا رمضان =مسلسلات
أنا ساعات والله بحس إني مش في رمضان
يعني حاجات بسيطة هي اللي بتحسسني فعلاً إني في رمضان
ماشاء الله التلفزيون دلوقتي بيقوم بالواجب في كل حاجة
أنا مش حقول أكتر من كدة أنا كنت بس عايزة أطلع غيظي
وسلام
الاحد, 10 ديسمبر, 2006
السلام عليكم ورحمة الله
ياااااااه بقالي كتير أوي مدونتش من17 أغسطس
الساعة 9 بس أنا رجعتلكوا تاني ..قاعدة علي قلبكوا
المهم
زي مانتوا عارفين إني ثااااانوية عااامة "اللهم احفظنا"ومبقتش اعد علي النت كتير أوي يعني
بس أنا عايزاكوا تدعولي
يللا سلاااام
الخميس, 17 اغسطس, 2006
السلام عليكم
حغيب فترة مش طويلة أوي يعني
من أول يوم السبت لغاااية الخميس إن شاء الله
عشان عقبال عندكوا ..حصييف
وإن شاء الله مايبقاش فيها لا شنط ضايعة ولا حاجة
والسلام عليكم
الاربعاء, 09 اغسطس, 2006
السلام عليكم
في الحبة الصغننين اللي أنا غبتهم كنت معزومة عند خالتي في العجمي في نادي الضباط عشان اقضي تصبيرة كدة لمصيف تاني يعني مطروح تقريباً إن شاء الله
لما وصلنا كنا مستنيين حد عشان يوصلنا مكان الشاليه وكنا مستنينه عند منطقة عمل يعني مفيهاش ناس كتير وكنا حاطين الشنط علي الأرض بس يا فرحة ماتمت للأسف سيبنا أكبر شنطة وأهم شنطة اللي فيها هدومنا
).gif)
اكتشفنا إن احنا نسيناها لما وصلنا الشاليه
لما ماما قالت لبابا فين الشنطة الكبيرة
قالها شنطة إيه؟
كان بيحسب إن احنا خدناها
ونقول فين الشنطة فين الشنطة وندور منلاقيش ونشوف في شنطة العربية برضه مفيش
رحنا للمكان اللي سيبناها فيه برضه ملقينهاش وسألنا يا عم مشفتش شنطة ..لا واللهياااااااه علي الغيظ دي منطقة عمل مفيهاش غير ناس يتعدو علي الصوابع
احنا اتصدمنا يعني حنقضي الأيام دي إزاي من غير هدوم وخصوصاً أنا وهل فعلاً المصيف انتهي قبل مايبدأ؟
وافتكرت آيه"وعسي أن تكرهوا شيئاً وهو خيٌر لكم وعسي أن تحبوا شيئاً وهو شر لكم والله يعلم وأنتم لا
تعلمون .."
وارتحت بعد كدة
بس احنا برضه مسمحناش لحاجة زي كدة ان هي تنكد علينا
وأنا اخدت هدوم من بنت خالتي وكانت حوسة
بس تعرفوا بابا قاللي حاجة لما قولته إن احنا ليه ملاقيناش الشنطة و مين حيكون اخدها؟
راح قاللي انت فاكرة نفسك فين .. انت في مصر يا بنتي
يعني تنسي حاجة انسي إن انتي تلاقيها تاني
بس الصراحة انا استفدت من الموقف دة وحمدت ربنا إن هي جت علي اد الهدوم يعني مش حاجة مهمة دهب مثلاً ولا كاميرا ولا حاجة
بس لو شفته اللي خد الشنطة دة
قضيت الكام يوم عادي وخلاص يارب بقي المصيف الجاي ميكونش فيه حوادث
الثلاثاء, 01 اغسطس, 2006
احم احم
بقالي كتيييير مدونتش
بس أنا النهاردة جايبة أغنية كانت عندي علي الكمبيوتر بقالها كتير جداً ومكنتش أعرف إن هي زي ماحكتبها دلوقتي
هي اسمها زمان وأنا صغير
أنا كنت بحسبها الأغنية العادية بتاعة هشام عباس
جيت افتحها سخسخت من الضحك
وأنا بهديها لكل طالب جامعي
الأغنية بتقول:
زماااااااااان ..زماااان وأنا صغير
كان نفسي أجيب تقدير..أجيب تقدير
تعب القلب واتحير من الرسم ومن التحبير
..
والرسم كان غريب مليان بالخطوط
والعقل كان غريب عمره ما كان مظبوط
..
ولما كبرت قلت ياريت ماكنت دخلت هندسة ولا جيت
قلت ياريتني فضلت في ثانوي ..زي زماان
..
حلمت زمان بشيت وحله يكون معايا ومن الأحلام صحيت لقيت المعيد ورايا
بصيت بصيت كان بيصححلي الشيت
ولقيت الصفر في شيتي منور
قلت ياريتني فضلت صغير
علي فكرة دي من طالب في كلية الهندسة
الاحد, 16 يوليو, 2006
*~*~*~*~*~*~*~*~*~*~*~*~*
السلام عليكمالعنوان غريب شوية... بس أنا شفت كاريكاتير مضحك عن التبرع حتي بالدرجات
المهم يعني سيبكوا من العنوان
*~*~*~*~*~*~*
وتتوالي مواضيعي عن الثانوية العامة..أعمل إيه ماهي دي الحاجة اللي شغلانا الفترة دي
المهم..
أخيراً طلعت النتيجة وانتهي القلق
مع إني مش في الثانوية العامة ولسة حدخل ثانية ثانوي السنة الجاية
إن شاء الله بس كنت قلقانة برضه زي مايكون نتيجتي أنا بس الحمد لله المجاميع حلوة السنة دي
إن شاء الله يدوم.. وطبعاً مواقع النتيجة كلها زحمة ومش بتيجي أصلاً عشان كله في حالة قلق بس في الآخر بنسمع الزغاريد
والبكاء من الفرحة
وبالتوفيق كلكوا
أنا عارفة قرفتكوا بمواضيع الثانوية العامة
دي بس معلش يللا عقبالنا
*~*~*~*~*~*~*~*~*~*~*~*~*
الاربعاء, 12 يوليو, 2006
مسمعتوش عن مرض جديد اسمه الثانوية العامة دة غير أنفونزا الطيور..طيب اسمعوا معايا
خلال الأيام اللي فاتت دي بنسمع كتييير عن حوادث الثانوية
العامة
طالب دخل الإمتحان فقد عينه
....
طالبة شافت ورقة الإمتحان جالها إنفجار في المخ وتوفتوبدل ماتاخد شهادة الثانوية أخدت شهادة الوفاة
...
طالبة إنتحرت بالمبيد الحشري عشان الإمتحان........
دمووووع
بكاء
إنهيارإنتحاار
في إييييييييييييه ؟؟؟
مش ملاحظين إن الحكاية دي زادت عن حدها قوي
في السنوات اللي فاتت مكناش بنسمع عن الحوادث ديكانت سنوات الثانوية العامة دي بتفوت وخلاص زي غيرها
لكن دلوقتي العيال تطلع يشدوا في شعرهم وينهاروا ودة طبعاً بيأثر في
الإمتحانات الجاية
لكن الحمد لله آدي الأيام دي عدت
وكله دلوقتي في إنتظار النتيجة
حتي أنا مع إني لسة السنة الجاية حدخل ثانية ثانوي
وادعوا لي
أنا حيجيلي مرض الثانوية العامة السنة الجاية 
أضافها مـ ـ ـي Maio0oia في شوية جد, عن التعليييم, مش حسيب حاجة في الدنيا إلا أما انقدها @ 07:17 م
(9) تعليقات| خبّر عن هذا المقال: | | | | | | |
الخميس, 06 يوليو, 2006
السلام عليكم
قبل ما تقروا الموضوع حاسبوا علي أعصابكوا أنا مش مسئولة
-------------------------
موصلكوش الخبر..
دجلة والفرات مشوا علي رجليهم وراحوا الحبشة
وكملوا لغاية السودان
طبعا حتقولوا إيه التخاريف دي...تخاريف نص الليل دي ولا إيه؟
حقول لكوا لا
دة اللي شوفته وسمعته
في برنامج السينما والناس
أبطال فيلم أوقات فراغ
هالة سرحان سألت
فين دجلة والفرات؟
واحدة قالت :في الحبشة ..ا ...لا لا في السودان
علي فكرة أنا شفت الإعلان بس
امال لو كنت شفت الحلقة كلها كان جرالي إيه؟؟!!
أنا اتصدمت اصلاً من الإعلان بس
للدرجة دي وصل جهل بعض الشباب
وعشان بعض الشباب دول.. يقوموا يتهمونا إن احنا جيل خربان
قولولي أخبار أعصابكم إيه؟
الخميس, 29 يونيو, 2006
أمي فلسطين لا تأسي ولا تهني ..إنا سنفديكِ من شيبٍ وشبّانِ
الخميس, 29 يونيو, 2006
.gif)
السلام عليكم
حرية الرأي
جملة بنسمعهاا كتيييييير
ولكن..
هل في مصر فعلاً حرية رأي وتعبير؟؟!!!حضرب مثال بسيط
كنت بتفرج علي برنامج
وشفت الفتاة آلاء فرج الطالبة بالثانوي
وفي إمتحان اللغة العربية في سؤال التعبير(الأول الثانوي) كتبت رأيها وعبّرت
وكانت النتيجة..
أن تم التحقيق معها
وانهالت الأسئلة عليها كالمطر
وكل دة عشان بس قالت رأيها اقولكوا الصراحة أول مابشوف الحكاية دي وبتكلم فيها
بتنرفزززززز ووشي بيبقي عامل زي الطماطماية
لأن البنت دي ادي وهي كانت متوقعة درجة عالية
لكن خاب ظنهاالحكاية وصلت من المصحح إلي رئيس الكنترول إلي مدير المدرسة إلي........الفضائيات
وكانت النتيجة إن البنت كادت أن تُحرم من عام دراسي كامل و أن تعيد السنة بأكملهاولكن..الحمد لله
وأخيراً و بعد عناء وبهدلة
وافقوا علي نجاح الطالبة ونقلها للصف الثاني الثانوي
يعني من الآخر لو عايز تقول رأيك بصراحة تبقي عامل حسابك علي بهدلة
و حاجات انتوا أكيد عارفينها----------------
أترك لكم التعليق..
أضافها مـ ـ ـي Maio0oia في عن التعليييم, مش حسيب حاجة في الدنيا إلا أما انقدها @ 04:42 ص
(18) تعليقات| خبّر عن هذا المقال: | | | | | | |
الجمعة, 16 يونيو, 2006
السلام عليكم
أكيد كلكوا شفتوا في الأخبار الطفلة هدي أبو غالية
فقدت والديها وأخواتها علي شاطئ بحرشمال غزة
خرجت برفقة عائلتها وعادت بلا أهل
تحولت الإبتسامة إلي دموع وصراخ
وماذا بعد..!؟
ماذا بعد أن قتل الكثير من أطفال المسلمين والعرب؟!!
ماذا بعد أن سفكت دمائهم الطاهرة؟؟!!
ماذا بعد أن شردوا؟!!؟
.
.
حسبي الله ونعم الوكيل